Di Wates Langit
di wates langit, pangjajap boa geus tepi
ngawujud sarupaning sasajen jeung do’a-do’a
leueuteun sapurati rasa, nalika harita
jadi udagan saban amprok
iwal ti galecok madungdengkeun pamadegan
urang lawung dina hiji rumpaka
rutinitas isuk jeung beurang jeung sore
jeung peuting nu teu daek tembres
sarta laku sarta lampah sarta kecap
patingkuniang ngirimkeun gambar
sempalan catetan wujudna langgam rumasa
sakeudeung ukur jadi panineungan
di wates langit, pangjajap boa geus tepi
ngawujud sirung luhur pasir bulistir
nu kungsi jadi tatapakan basa
: mun tepi ka pinasti, kurebkeun kuring di dieu…!
Parunggawul, 6 agustus 2006
Ungkara
liwat monitor katara udat-udat renghap
dibarung paringetan tensi nu teu kaur reureuh
ieu nyawa aya dina tungtung selang-selang
pajurawet ibarat areuy panangtu hirup
sakali dua dicatet dina lambaran laporan
unina jentre, itungan menit itungan detik
sarta mun seug datang jiad-jiad panglayad
kecap-kecap wujudna pilakadar pangbeberah
saheulaanan ieu nyawa nyingkahan jarak
antara pati jeung hurip, pasrah lillah
pirang-pirang do’a kapireng ibarat koor panjang
ti unggal munara nongtoreng beja walurat
saksenan ieu raga, saksenan!
harewos kapireng gahar, boa eta teh lagu
telekin ngageuri minuhan rohangan mangsa
harita dina monitor teu katingal deui udat-udat renghap!
Parunggawul, 8 Agustus 2006
Tidak ada komentar:
Posting Komentar